“ Ana və Uşaq"

“Şərh” sözü açma, anlatma, izahetmə, təfsiretmə,, bildirmə kimi mənaları ifadə edir. Amma sosial şəbəkə seqmentində istifadəçilərin böyük əksəriyyətinin  yazdıqları  “şərh”  çat söhbətlərindən başqa bir şey deyil.

   Müxtəlif saytlarda  paylaşımlara yazılmış  şərhlər:

“Təşəkkür edirəm,maraqlı idi”, “lazımlı məlumatdır,çox gözəl” , “Qurumsaq ograş”, “Alllah uzaq etsin”, “Dəhşət”,  “Niyə bizim cəmiyyətimiz boşanmış qadınları qəbul etmir?”, “tsk, təşəkkür edirəm, hi..hi, ha..ha…xe…xe, atdım seçilmişlərə və s”.

Bir xəbərdə kriminal hadisə haqqında məlumat verilir. Kiminsə başına bədbəxr hadisə gəlib. İstifadəçilərdən biri də “şərh” yazıb : “Lap pis oldum…Teşekkür”. Məgər  bu, şərhdir? Bunlar dialoq formasında olan çat söhbətidir və sair.

Belə  standart şərhlər həmin auditoriyanın  səviyyəsini ortaya qoymaqla bərabər, cəmiyyətin  gələcəyi üçün proqnoz kimi də qəbul edilə bilər. 

Yotube səhifəsində  paylaşılan  bayağı  mahnılara yazılan   şərhlərə baxın. Ara  mahnılarına, onları ifa edənlərə elə   fikirlər səsləndirilir ki, vallah, Yalçın Rzazadəyə, Gülağa Məmmədova belə pərəstiş, bəlkə də yoxdur.

 Həqiqi  mənada  isə Yalçın Rzazadəyə, Gülağa Məmmədova, eləcə də Azərbaycan musiqisinin  müəzzəm sütunları  olan  daha  neçə sənətkarımızın   heç belə  bayağı   rəğbətə ehtiyacları da yoxdur. Bu sənətkarların rəğbətliləri bütün xalqdır.  İndi  qələm adamları da    insanlaraölçülməli, dəyərləndirilməli olanları  hesaba  almağı, dəyərləndirə bilməyi, ağı-qaranı fərqləndirə bilməyi öyrətməlidir. O cümlədən  “Ana və Uşaq ” da.

“Ana və Uşaq” 2005-ci ildə Azərbaycan Respublikası Ədliyyə Nazirliyi tərəfindən qeydə alınmış mətbu nəşrdir. Bir müddət ənənəvi çap formasında, 2012-ci ildən nəşr formasını  həm operativlik, həm də  maddi üstünlüklərini nəzərə alaraq sayt kimi fəaliyyət göstərib.  2022-ci ilin aprel ayının  4-dən  isə WordPress bazasında  bloq kimi yayımlanmağa qərar verdik. 

 “Ana və Uşaq ” ana,ailə və uşaqlar haqqında maarifləndirici, əxlaqi-tərbiyəvi mövzuda yazılar təqdim edəcəkdir. Biz bu  adı təsadüfən seçmədik.  “Ana və Uşaq” dedikdə təkcə qadınlar, uşaqlar nəzərdə tutulmamalıdır. Azərbaycan bizim hər birimizin anasıdır və biz də onun övladlarıyıq. Bu mənada bloqumuz süd qoxulu körədən tutmuş, ixtiyar qacayadək hər kəsin mətbu ehtiyaclarına xidmət edəcəkdir.

  Azərbaycan qadını  bir vəfa rəmzidir. Azərbaycan qadını möhtərəm anadır. Azərbaycan qadını tarixən  “qeyrət”, “papaq”, “ləyaqət” sözlərinin  sinonimi olub.  Azərbaycan  qadınlarıdır  Azərbaycan ailələrini, ərləri vüqarlı edən. Orta əsrlərdə Azərbaycan hökmdarlarından Qızıl Arslanın həyat yoldaşı Qətibə xanım, Özbək xanın həyat yoldaşı Mehrican xanım, Uzun Həsənin anası – Şərqdə ilk diplomat qadın Sara xatun, Şah İsmayıl Xətainin qızı Məhinbanu, Şirvanşah Xəlilullanın həyat yoldaşı Pəri xanım, Şah Abbasın anası Xeyransa bəyim, Əfsanəvi Tuti Bikə , Xurşid banu Natəvan, Ağa bəyim ağa Ağabacı, Qönçəbəyim, Fatma xanım Kəminə, Çahnigar xanım, Gövhər xanım Qacar, Həmidə xanım Cavanşir, üzü bəri gəldikcə, Nigar xanım Şıxlinskaya, Məsmə xanım Talışinskaya, Səltənət xanım Əhmədova, Leyla Məmmədbəyova, Züleyxa Seyidməmmədova, Sona Nuriyeva, Mərziyə Davudova, Fatma Qədiri, Hökümə Qurbanova, Nəsibə Zeynalova, ağabacı Rzayeva, Elmira Şaxtaxtinskaya, Nigar Rəfibəyli, Mirvarid Dilbazi, Əzizə Cəfərzadə, məçhur alimlər Umnisə Musəbəyova , Zəhra Quliyeva, Zərifə xanım Əliyeva, Azərbaycanın Milli Qəhrəmanlarından Salatın Əsgərova, Gültəkin Əsgərova, müasir dövrümüzdə Adilə Namazova, Zeynəb Xanlarova, Mehriban Əliyeva kimi neçə-neçə məşhur qadınlarımız var ki, onlar xalqımızın həyatında, milli dəyərlərimizin formalaşdırılmasında müstəsna rol oynamış və bu gün də bu şərəfli vəzifəni davam etdirməkdədirlər.

 44 günlük müharibədə qazanılmış  Zəfərin sevincləri,  bəxş etdiyi qürur üstündən bir ildən də artıq vaxt keçməsinə baxmayaraq  heç vaxt  bizi tərk etmir  və heç vaxt da tərk etməyəcək. Xalqımız öz lideri ilə sarsılmaz  birlik nümayiş etdirdi, əsgər və zabitlərimiz hərbi xidmət vəzifəsindən də ali bir vəzifəni yerinə yetirdilər. Bunlar haqqında çox yazılıb və yazılacaq  da. Amma   müharibə ərəfəsində arxa cəbhədə baş verənlər,  qadınların, anaların nümayiş etdirdikləri   ləyaqət nümunələrini  diqqətə  gətirmək istəyirəm.

Nargül adlı gəlinimiz  əvvəlcə  əvvəl qardaşı Eltonun, sonra da   həyat yoldaşı Adilin nəşini çiyinlərində daşıdı.

Firuzə adlı digər  bir gəlinimiz  də ömür-gün yoldaşı Röyalın tabutunu   çiyinlərində daşıdı.  Belə qadınlar ancaq Azərbaycan  anasının qızları ola bilər. Bu gəlinlər    hamımız  hörmətlə baxdığımız bir  ailənin bir nəslin deyil, bütün  xalqın gəlinidir. Azərbaycan ərlərini  qürurlu edənlər  bu cür qadınlardır. Onda    göz önünə, xəyala gətirmək çətin deyil ki,  torpağımız uğrunda şəhid  olmuş  igir eloğlumuz necə ər  imiş.

 Qazax rayonunun Aslanbəyli kəndindən olan  qızımız döyüşdən tayqıç qayıtmış qəhrəman bir əsgərimizlə ailə həyatı qurdu. Həm bir  ailənin, həm də xalqın  gəlini oldu.

 Bunlar hamısı dünyaya, insanlığa görk  olunmağa layiq   nümunələrdir. Azərbaycan xalqının  genetik yaddaşında da, gerçək həyatında da mərhəmətli, möhtərəm QADIN obrazı budur.

 Dünya QADIN obrazları arqasında Azərbaycan qadınının öz şərəfli obrazı və özünəməxsus imici var. Bunlar varkən, onların sayı bir deyil, on deyil, yüz deyil, min deyil,   bizim şou televiziyasında  və şou saytlarında  qadın obrazını nə hala salırlar.  Şərəfli qadınlarımız qalıb  arxada,  yoldan tutub gətirilən aparıcılar ekrana kimləri dəvət edib, bizim   ehtiram göstəilməyə layiq qadnlarımızın fövqünə qaldırırlar.

 İndi  maarifçiliklə, informasiya yaymaqla  məşğul olan mətbu nəşrlər bunların fərqində olmalıdır. Hər bir jurnalist, sənət adamı qələmin, sözün müdriklik haqqından ali dəyərlərimiz naminə  istifadə etməlidir. Dədə-babaların, ixtiyar nənələrin boynumuza qoyduğu məsuliyyəti atmadan, heç bir fiziki və ya mənəvi  təzyiqlərə uğratmadan   kiçiltmədən     daşımalı, əmanətə sədaqətlə  gələcəyə ötürməliyik.  Bu, təkcə ürək yox, həm də   böyük zəka, zəngin həyat təcrübəsi istəyir.

  Beynində işıqlı arzular yuva salmış   hər bir qələm adamı  bilik və  bacarığını  bu məqsədə  həsr etməlidir.

 Yaxşılardan və  yaxşılıqlardan əsla yan keçməmək,    faydalı əməyi ilə “cahan  süfrəsinə  ”xeyirli nəsə   əlavə etmək  amacı  söz, fikir sahibinin ictimai fikirdə   müdrik obrazını yaratmalıdır.  Təbii ki, pisləri, pislikləri  təqib etmək,  inkişafımıza  əngəl  olan neqativ halları ictimailəşdirmək,  aidiyyəti qurumların diqqətinə çatdırmaq da  jurnalistikamızın qayğılarındandır.

  Tənqidi, irad bildirməyi, ictimai qınağı  heç kim qadağan etməyib. Əksinə,  dövlət başçısı Cənab İlham Əliyevin ölkə həyatı ilətanışlıq, xalqla əlaqə formalarından biri də   mətbuat və televiziyadır.

 2017-ci il iyul ayının  20-də Prezident İlham Əliyev Milli Mətbuat Günü münasibətilə  jurnalistlər üçün tikilmiş növbəti binada mənzillərin paylanması mərasimində çıxışı zamanı demişdir: “…Bu məlumatlar haqqında mən hərdən mətbuatdan da xəbər tuturam, dərhal reaksiya verirəm. Dövlət məmurları və yaxud digər şəxslər bilirlər ki, Azərbaycanda söz azadlığı, mətbuat azadlığı imkan verməyəcək ki, onlar hansısa işlər görsünlər, qüsurlar buraxsınlar. Ona görə, jurnalistlər bəlkə özləri də bilmədən mənim köməkçilərimdir”.

   Cənab  Prezident  bu fikri deyəndə, təbii ki,   təkcə   nöqsanlara qarşı barışmaz mövqe ortaya qoyan   mətbu subyekt və jurnalistlər  haqqında deyil,   həm  də inkişafımızı, uğurlarımızı iftixar mövzusu edən,  cəmiyyəti, xüsusən yetişməkdə olan  nəsli maarifləndirən  kütləvi informasiya vasitələri və onların  əməkdaşlarını da nəzərdə  tutmuşdur.

 “Ana və Uşaq”  fəaliyyətə başladığı 2005-ci idən  bu məsləkə xidmət etmişdir.

 Reytinq dalınca qaçmamışıq,  oxucu cəlb etmək üçün     gərəksiz mövzulara və şəkillərə  meydan verməmişik.

Belə etsə idik,  bizim istifadəçi  sayımız da, baxış  sayımız da indikindən  qat-qat çox olardı.

Biz hər zaman dilimizin   qayda-qanunlarına məsuliyyətlə yanaşmışıq və   bütün auditoriyamız ada na dilimizə hörmətlə yanaşıb. 

İndiyə kimi qeydiyyatdan keçən istifadəçilərimizin sayı

81 466  nəfər olub. Ümumi baxış sayı isə 13 68522 olub.

Xəbərlərimizin ümumi sayı 3871  olub.  Bunlardan 1995 xəbərin müəllifi  baş redaktor kimi özüm olmuşam.15   nəfərə yaxın  digər xəbər müəlliflərimiz də olub, hazırda  onlardan  ikisi ilə əlaqəmiz var.

  Əlbəttə,  bunlar   sıradan  bir statistika deyil. Bunun  arxasında  saytımızın  gərgin əməyi  dayanır.

Ümid edirik ki, biz yeni dostlarımızın sayəsində  “Ana və Uşaq”  saytını   ölkəmizin  qadın, ailə və uşaqlarla bağlı saytları  arasında öncüllərdən biri səviyyəsinə  qaldıracağıq.

 Oxucularımızı  fəal olmağa dəvət edirik. Siz bizim üçün çox dəyərlisiniz və təvazökarlıqdan uzaq olmasın, sizə təqdim etdiyimiz “Ana və Uşaq”  ilk gündən belə olub və  üstünə gələcək ki əskilməyəcək.

 Kateqoriyalarımızda bəzi dəyişikliklər etmişik.

 Hesab edirik ki,  bu kateqoriyalarla gözəllik,əxlaq, qədirşünaslıq,  zəka, əməksevərlik, mehribanlıq, qayğıkeşlik, həssaslıq, səmimiyyət, xeyirxahlıq kimi ən vacib yüksək əxlaqi keyfiyyətləri əhatə etmək  mümkün  olacaq.  

Təbiiki,  qayğıkeş ana, vəfalı ömür-gün  yoldaşı kimi Qadın saytımızın  zinəti olaraq qalacaqdır.

Bu gün cəmiyyətdə fəal həyatdan təçrid olunmuş çoxlu sayda qadınlarımız  var, onlar evdar qadındır, təqaüdçüdür və sair.  Eləcə də  əlillərimiz, xəstə və qocalarımız var. Onların  fəal cəmiyyətə qovuşmasına  saytımızla  stimul verəcəyimiz   şəksizdir.

 Azərbaycandan   kənarda yaşayan nə qədər soydaşımız var. Saytımız  Azərbaycanla  onlar arasında  canlı ünsiyyət körpüsü olacaq.

   Hər bir oxucumuzu saytımıza yazılmağa, yazılarımızı bəyənməyə və paylaşmağa dəvət edirik.

Biz Sizinlə İLK-lərdən olacağımıza çox  ümid edirik.