“ Ana və Uşaq"

Zümrüd xanımın oğlu – Araz Dadaşzadə filologiya elmləri doktoru, Əməkdar Elm xadimi, Azərbaycan Ensiklopediyasının baş redaktoru olmuşdur. Nəvələri :  Aqşin Dadaşzadə – filologiya üzrə fəlsəfə doktoru, Zümrüd Dadaşzadə – sənətşünaslıq üzrə fəlsəfə doktoru, Ü.Hacıbəyli adına Bakı Musiqi Akademiyasının “Musiqi tarixi” kafedrasının professoru, Əməkdar İncəsənət xadimi olmuşdur

7 dekabr 1961 –ci ildə 49 yaşında vəfat etmişdir.

1938 — Məşhur  qoboy ustadı, bəstəkar və pedaqoq  Kamil Cəlil oğlu Cəlilov  Bakıda Buzovna qəsəbəsində anadan olub.

Kamil Cəlilov qışı Bakının Yuxarı məhəlləsində, yayı isə Buzovnada keçirirdi. Orta təhsilini Bakıdakı 176 nömrəli tam orta məktəbdə almışdır. Eyni zamanda o, 1955-ci ildə Bakı şəhər 1 saylı musiqi məktəbində dərs almışdır.

Sonra Asəf Zeynallı adına Musiqi Məktəbinə, Fuad Sadıqbəyovun sinfinə daxil olub və 1959-cu ildə orada təhsilini başa vurub. İmtahanda Azərbaycan və Qərb bəstəkarlarının bir neçə əsərlərini çalaraq konservatoriyaya daxil olub.

Kamil Cəlilov artıq 1965-ci ildən ixtisaslı qoboy ifaçısı kimi sənətə vəsiqə alıb.

Kamil Cəlilovun qoboy ifaçılığı sənətində yeniliyi ilk dəfə muğamları bu alətdə tətbiq etməsidir. “Bayatı Kürd”, “Segah”, “Zəminxara”, “Bayatı-Şiraz”, “Rahab”, “Zabul”, “Hümayun”, “Qarabağ şikəstəsi”, “Kəsməşikəstə” muğamları Kamil Cəlilovun ifaçılıq sənətinə bəxş etdiyi dəyərli incilərdi. “Rahab”, “Yanıq Kərəmi”, “Kəsməşikəstə”, “Səmayi-şəms”, “Baş sarıtel», “Cəlili” və bu kimi musiqi nümunələrini özünün tərzində ifa edərək qoboy alətini yenidən şərqləşdinnəyə nail olmuşdur.

Onun ifasında “Apardı sellər Saranı”, “Sarı bülbül” və birsıra digər xalq mahnıları çox yanıqlı və kövrək səslənir. Kamil Cəlilovun ifasında Nikolay Rimski-Korsakovun “Çar Soltan haqqında nağıl” operasından “Arının uçuşu”, Üzeyir Hacıbəyovun “Firuzə” operasından “Firuzənin ariyası”, Fikrət Əmirovun “Mən səni araram”, “Göygöl” mahnıları, Arif Məlikovun “Məhəbbət əfsanəsi” baletindən bir sıra fraqmentlər səslənərək, dinləyicilərin yaddaşına əbədi həkk olunmuşdur.

 Kamil Cəlilov 22 fevral 2022-ci ildə 83 yaşında vəfat etmişdir.

Vəfat etmişdir:

1970 – Azərbaycan görkəmli alimi, tibb elmləri doktoru, professor İbrahim Mustafa oğlu Topçubaşov 45 yaşında Bakıda vəfat etmişdir.

İbrahim Topçubaşov 7 noyabr 1924-cü ildə Bakıda anadan olub.

1950-ci ildə Azərbaycan Tibb İnstitutunu bitirdikdən sonra Quba rayonunda və Maştağa rayon xəstəxanasında cərrah işləyib. 1958-ci ildən Azərbaycan Tibb İnstitutunda Cərrahiyyə kafedrasında fəaliyyətə başlayıb. 1961-ci ildə doktorluq dissertasiyası müdafiə edib.

Professor Topçubaşov təbabətin ən mühüm məsələlərinə həsr edilmiş yüzdən cox elmi əsərin müəllifidir. Onun əsərləri Çexoslovakiyada, Polşada, Bolqarıstanda, Türkiyədə, Yaponiyada çap edilib. Həssas qəlbli insan və qayğıkeş alim həm də bəstəkar kimi tanınıb.

O, bir cox lirik mahnının müəllifidir.

İbrahim Topçubaşovun atası görkəmli akademik Mustafa Topçubaşov, anası isə Azərbaycan SSR-in Əməkdar incəsənət xadimi, rəssam Reyhan Topçubaşova olub.

 2005— Azərbaycanda rəssamlıq məktəbinin görkəmli nümayəndəsi, Xalq rəssamı Kamil Müseyib oğlu Əliyev 82 yaşında Bakıda vəfat etmişdir.

Kamil Əliyev 1921-ci il oktyabrın 22-də İrəvan şəhərində anadan olmuşdur.

1936-cı ilin sentyabr ayında anası onu, Bakı Rəssamlıq Məktəbinə – tanınmış rəssam Əzim Əzimzadənin yanına aparır. Məktəbə qəbul edilən K. Əliyev 3 il burada dekorasiya şöbəsində təhsil alır və müəllimlərinin məsləhəti ilə oxuya-oxuya “Azərxalça” birliyində eksperimental laboratoriyada köçürücü rəssam kimi işləməyə başlayır.

K. Əliyev Böyük Vətən müharibəsində iştirak etmiş, onun döyüş rəşadəti 22 orden və medalla təltif edilmişdir.

Kamil Əliyev Bakı Bədii Rəssamlıq Fondunda çalışarkən fil sümüyündən, qızıldan, gümüşdən onlarla orijinal əntiq əşyanın, gümüş dolça, çaydan, armudu stəkan dəstlərinin bədii tərtibatçısı, rəssam – müəllifi kimi özünü təsdiqlədi. Bədii sənət üzrə fəxri fərmanın da, respublikanın “Tətbiqi incəsənət ustası” adının ilk sahibi də 1960-cı ildə Kamil Əliyev oldu.

Kamil Əliyev incəsənətimizi yüksəkliklərə qaldıran, onu öz əsərləri ilə daha da zənginləşdirən görkəmli şəxslərdən biridir. Rəssamın əsərləri Paris, London, Tokio, Dehli, Ankara, İstanbul, Tehran, Moskva, Kiyev və başqa şəhərlərin nüfuzlu muzey və qalereyalarında nümayiş etdirilərək, tamaşaçıların hüsn-rəğbətini qazanmışdır.

Kamil Əliyev 1 mart 2005-ci ildə vəfat etmişdir.

2010 —  Tanınmış aktrisa   Lütviyyə Şamil qızı Səfərova 68 yaşında vəfat etmişdir.

Lütviyyə Səfərova 1941-ci ildə anadan olub. Asəf Zeynallı adına Bakı Musiqi məktəbinin vokal şöbəsini bitirdikdən sonra Azərbaycan Dövlət Musiqili Komediya Teatrında işləməyə dəvət edilib. Bu teatrda Fikrət Əmirovun “Gözün aydın” komediyasında Leyli, Vasif Adıgözəlovun “Nənəmin şahlıq quşu” əsərində Nazlı, Emin Sabitoğlunun “Hicran” komediyasında Çarleston, Şəfiqə Axundovanın “Ev bizim, sirr bizim” əsərində Çiçək və onlarla başqa surətlər canlandırıb. 1989-cu ildən Bakı Bələdiyyə “Tənqid-Təbliğ” teatrında işləyib. 1996-cı ildə yenidən Azərbaycan Dövlət Musiqili Komediya Teatrına qayıdıb və “92 dəqiqə gülüş”də Qəmziyyə, “Hələlik”də Lalə, “On min dollarlıq keyf”də tərcüməçi qadın, “O olmasın, bu olsun”da Sənəm, “Dəli dünya”da ana, “Nəğməli Könül”də Qəmər xanım, “Bankir adaxlı”da Ceyran və s. kimi surətlər yaradıb. O, bir çox televiziya tamaşalarında və filmlərdə də əsas rollara çəkilib.

2012 – Azərbaycanın Əməkdar artisti, tanınmış diktor Hicran Soltan oğlu Hüseynov 70 yaşında Bakıda vəfat etmişdir.

Hicran Hüseynov 1942-ci ilin may ayının 6-da Qəbələ rayonunda dünyaya gəlib. 1959-cu ildə Qəbələ rayon orta məktəbini bitirdikdən sonra Bakı Kitabxanaçılıq Texnikumuna daxil olmuşdur. 1961-ci ildə həmin texnikumu bitirdikdən sonra sovet ordusu sıralarına çağırılmış və 1964-cu ildə sovet ordusu sıralarından tərxis olunmuşdu.

1964-cu ilin avqust ayinda Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsinə daxil olmuş və 1968-ci ildə həmin institutu bitirərək təyinatla Sumqayıt Dövlət Dram Teatrına aktyor kimi göndərilmişdi.

Həmin teatrda bir il işlədikdən sonra yenidən sovet ordusuna zabit vəzifəsinə çağırılmışdı. İki illik vəzifə borcunu yerinə yetirdikdən sonra Azərbaycan Televiziyasında elan edilən müsabiqənin iştirakçısı olmuş və üçüncü müsabiqədən keçərək AZTV-yə diktor vəzifəsinə dəvət edilmişdi.

1971-ci ildən AZTV-də əmək fəaliyyətinə başlamış, ali dərəcəli diktor vəzifəsinə qədər yüksəlmişdir. Əsasən gənclər üçün hazırlanmış proqramların aparıcısı kimi, sonralar informasiya proqramlarının, “Günün ekranı” və “Xəbərlər” proqramlarının daimi aparıcısı kimi fəaliyyətini davam etmişdir.

2006-cı ildə Azərbaycan prezidenti İlham Əliyevin fərmanı ilə Azərbaycanın Əməkdar artisti fəxri adına layiq görülmüşdü.

AZTV-nin “Mədəniyyət” kanalında baş redaktor vəzifəsində fəaliyyətini davam etdirmişdir.

Bayramlar və xüsusi günlər

Ümumdünya Yuxu Günü

Bu gün Ümumdünya Yuxu Günüdür.  2008-ci ilə təsis edilən bu tədbir hər il mart ayının üçüncü cümə günü qeyd edilir.