“ Ana və Uşaq"

Hər il Azərbaycanda 1 iyul Bakılılar Günü kimi qeyd edilir.

Bu əlamətdar gün rəsmi şəkildə qeyd olunmasa da, bakılılar özləri  belə  mənəvi həmrəulik günü yarızarafat, yarıciddi  həmrəylik günü müəyyən etmişlər…

Bu gün dünyanın  hər tərəfinə səpələnmiş bütün bakılılar  internet texnologiyalarının verdiyi imkanlarla  bir-birini təbrik edir, bir-birlərinə xoş sözlər deyir,  doğma şəhərlərinə sülh və firavanlıq  arzulayırlar.

Bakı dünyanın ən çoxmillətli şəhərlərindən biridir. Belə ki, burada yetmişdən artıq millətin nümayəndələri bir yerdə, mehribancasına yaşayıb və yaşayırlar. Azərbaycan fərqli ləhcələrə malik ölkə kimi tanınır, lakin Bakı ləhcəsi təkcə azərbaycanlılar üçün deyil, həm də Bakıda doğulan başqa millətlərin nümayəndələri üçün doğmadır.

 Xəzər dənizinin qərb sahillərində — Abşeron yarımadasının cənubunda yerləşən Bakıya “küləklər şəhəri” də deyirlər. Quru subtropik iqlimi var. Ümumi sahəsi 2130 km2-dir.

Bakı şəhərinin tərkibinə 12 inzibati rayon, 59 qəsəbə daxildir. Şəhərin mərkəzi hissəsi Bakı buxtasına pilləli enən amfiteatrda yerləşir. Bakının dəniz sahili hissəsi okean səviyyəsindən təqribən 28 m aşağıdır. Bakı ərazisində faydalı qazıntılardan neft, qaz, tikinti materialları hasil edilir.  Zeytun, üzüm, əncir kimi   dadlı və müalicəvi meyvələri var. Bir dostum söhbət edir ki, bağda qalanda   ana   üzümlə bərabər  kuzədə  su da qoyurdu. Çünki üzüm çox şirin olurdu…  iki üzüm giləsi yeyəndə,bir qurtum da su içərdik.

Bakıda bir çox tarixi abidələr müasir dövrdə də qorunub saxlanılır. XII əsr “Qız Qalası” (“Gözətçi qülləsi”, “Göz qülləsi”), “Qala divarları”, XV əsrin əvvəllərində tikilmiş “Şirvanşahlar sarayı” (Xan sarayı), XIV-XVI əsrlərə aid “Buxaralılar karvansarayı” və “Hindistanlılar karvansarayı”, “Cümə məscidi” və başqaları  bu cür maddi-mədəni sərvətlərimizdəndir.

  Bakı paytaxt şəhərimizdir,ölkəmizin baş şəhəridir.  Elmi-mədəni mərkəzlər, istehsal sahələri  burada cəm olduğundan  Bakı hər birimizə pasibanlıq edib.   Alovlu gəncliyimiz bu şəhərin isti, mehriban qucağında keçib. Bir lirik mahnıda deyildiyi kimi:

Gündüzün kimidir gecələrin də

Ayaq izlərim var küçələrində.

Olsam da dünyanın mən hər yerində,

Sənsiz açılmayır səhərim mənim…

  Bakı tək  öz insanlarına deyil, hər kəsə  hər zaman  qonaqpərvərlik göstərib. Keçən əsrin əvvəllərində  qonşu ölkələrdən axışıb neft Bakısına gəlir, ailələri üçün çörək qazanırdılar.   İkinci Dünya  müharibəsi  zamanı Sovet ordusunun qələbəsini şərtləndirən  bütün  hərbi texnikanın yanacaq-sürtkü yağlarını, benzinini  Bakı təmin etmişdir.   Amma bizim  Bakıya ədalətsizlik etdilər: “Qəhrəman şəhər” statusu vermədilər.

  Hələ müharibədən əvvəl  rus şairi Mayakovskinin  “Bakı” şeirində  doğma şəhərinmizə   qoyduğu yarlığa baxın:

Bakı-

 Donqar burun adamlar…

Bakı,

heç kim sənin torpağında məskunlaşmır

Əyləncə üçün.

Bakı –

bu dünyanın pencəyində yağ ləkəsi.

Vladimir Mayakovski  bu şeiri 1923-cü ildə yazmışdır.

   Digər ölkələr onları təmsil edən yaradıcıadamlar, elit təbəqə  Bakıya   laqeydliyini başa düşürük. Bəs özümüz?

İndi niyə  Bakılılar  gününün  qeyd edilməsi heç də hamı tərəfindən birmənalı qarşılanmır. 

Hətta, Milli Məclisin deputatlarından biri    bu günün qeyd edilməsinin əleyhinədir. Niyə?

 Belə izah edirlər ki, bu, regionçuluq yarada bilər. Axı belə deyil.  Bakı  bizim hamımız üçün  Ana olub. Bu şəhərə nə şöhrətli  ad verə biləriksə, haqqıdır, halalı olsun.  30 ildən artıq  işğal dövründə  biim bakı bütün qaçqın və köçkün həmvətənlərimizə sinəsində yer verdi. Regionlarda   iqtisadi vəziyyət   yaxşı olmayanda hamı axışıb gəldiyi şəhərdir  Bakı. Bakı heç kimə üz turşutmayıb, üstlərinə  qapı bağlamayıb. Bakılılar da  elə Bakı kimi  hamımız mehribanlıq göstərib.Ona görə də  mən Bakılılar gününün dövlət tərəfindən qəbul edilməsini arzu edirəm.

   Bakılı sayılmaq  təkcə burada yaşamaq deyil,  həm də onu sevmək, gözələşdirmək üçün əmək sərf etməkdir.

  Doğma və əziz Bakı, mən mövqeyimi  ifadə etdim. Bu şəhərdə doğulub, yşayıb, onu gözəlləşdirən hər kəs  bakılıdır. Bu gün onların günüdür. Onlara eşq olsun..

Əziz Bakılılar, gününüz mübarək!