“ Ana və Uşaq"

Maraqlı məlumat

Qədim yunanların inancına görə, bütün dünyanı uca Olimp dağında yaşayan ilahlar və ilahələr idarə edirdi. Onların arasında “Fetida” adlı su ilahəsi də vardı. Fetidanın oğlunun adı Axilles idi. Bu uşağın atası adi insan olduğundan Axilles də insan sayılırdı .Lakin o, uşaqlıqdan gücünə və qamətinə görə hamıdan seçilirdi. Fetida oğlunun ilahlar kimi ölümsüz olmasını istəyirdi, ona görə də onu hələ körpə ikən yeraltı səltənətdən keçən Stiks çayının sularına salmışdı. Bu çayın suyu insanın hansı yerinə dəyərdisə, bədənin həmin hissəsinə heç bir qılınc və ya ox təsir etməzdi.

Axilles ən cəsur yunan qəhrəmanlarından biri idi, eləcə də, bir çox Qədim Yunan əsatirlərinin qəhrəmanıdır. O, məğlubedilməz, cəsarətli bir insan idi. Düşmənin atdığı oxların heç biri ona zərər vurmazdı. Yəqin ki, “Axillesin dabanı” ifadəsini eşitmisiniz. Əgər o, məğlubedilməz və cəsarətli olubsa,  dabanın bu məsələyə nə dəxili var?!

Axillesin tərbiyəçisi kentavr Xiron onu şir, ayı və qabanların daxili orqanları ilə bəsləyir, kifarada çalıb oxumağı öyrədir. Onun sayəsində Axilles qorxu bilməz döyüşçü kimi boya-başa çatır. Axillesi bütün Yunanıstanda məşhur edən isə Troya müharibəsində iştirakı oldu. Yunanlarla troyalıların müharibəsi 10 il davam etdi. Bu müharibənin 10-cu ilində baş verən hadisələr böyük yunan şairi Homerin “İliada” əsərində təsvir olunub.

Troya ordusunun başında hökmdar Hektor dururdu. Yunanlarda isə ən güclü sərkərdə Axilles sayılırdı. Hamı Axillesdən qorxur, onunla üz-üzə gəlməkdən çəkinirdi.

Döyüşlərdən birində Hektor Axillesin yaxın dostunu qətlə yetirdi. Bundan qəzəblənən Axilles silahlanıb Hektorla təkbətək döyüşə çıxdı və onu məğlub etdi.

Hektorun ölümündən sonra onun qardaşı Paris intiqam hissi ilə alışıb-yanır, Axillesi öldürmək üçün fürsət axtarırdı.

Dostunun yasına başı qarışmış Axilles bir müddət sonra yenidən döyüşə girdi və öz nizəsi ilə yüzlərlə troyalının həyatına son qoydu. Döyüş zamanı Paris yayını çəkib Axillesin dabanını nişan aldı.

O bilirdi ki, Axillesin bədəni istənilən ölümcül yaraya davam gətirə bilər, yalnız bir yerindən başqa. Bu da onun dabanı idi. Axı ilahə Fetida oğlunu suya salarkən onun dabanından tutmuşdu və Axillesin dabanına su dəyməmişdi. Buna görə də Paris oxunu düz Axillesin dabanına yönəltdi. Beləliklə, Axilles aldığı yaradan həlak oldu.

Məhz bu rəvayət əsasında “Axilles dabanı” ifadəsi meydana gəlib. Bu ifadə bir çox xalqların dilində işlənir və “insanın ən zəif yeri” deməkdir.

Bəs sizin necə, “Axilles dabanı”nız varmı???